“Alibaba” корпорацын үүсгэн байгуулагч Жек Магийн бэлэглэсэн нэг сая амны хаалт, 200 мянган оношлуурыг ОХУ-ын Сансрын зэвсэгт хүчний онгоц Хятадаас тээвэрлэн авчирчээ.

Жек Ма ОХУ-ын батлан хамгаалахын сайд Сергей Шойгутай утсаар ярихдаа, Хятад улсад коронавирусний халдвар дэгдэж буй үед ОХУ тусламж үзүүлсэнд талархал илэрхийлжээ.

-Италийн “Armani” загварын ордон Итали дахь өөрийн бүх үйлдвэрээ өөрчлөн зохион байгуулж, эмч, эмнэлгийн ажилтнуудад зориулан хамгааалтын хувцас үйлдвэрлэхээр болжээ.

Энэ сарын эхээр Жоржио Арманигийн үүсгэн байгуулсан загварын ордон нэг сая еврогийн хандив Милан хотын эмнэлгүүд болон Ромын Халдвар өвчин судлалын  үндэсний хүрээлэнд өргөжээ Алдарт загвар зохион бүтээгч энэ оны хоёрдугаар сарын сүүлээр Милан хотноо хаалттай загварын шоу зохион байгуулж, долоо хоногийн дараа Милан дахь офис, Италийн хэд хэдэн мужид өөрийн үйлдвэрүүдээ хаасан байна.

-Автомашин үйлдвэрлэгч “Fiat Chrysler Аutomobiles” компани ойрын өдрүүдэд амны хаалт үйлдвэрлэж эхлэх гэнэ. Тус компани сард дор хаяж нэг сая амны хаалт үйлдвэрлэхээр ажиллаж байна.