БНСУ-ын Хүнс, эмийн аюулгүй байдлын яам АНУ-ын “Pfizer” эмийн компанийн “COVID-19”-ийн дотуур ууж хэрэглэдэг эмэнд яаралтай журмаар хэрэглэх зөвшөөрлийг өнөөдөр олгожээ.

Энэ нь БНСУ-д “COVID-19”-ийн эмчилгээнд хэрэглэхийг зөвшөөрсөн анхны дотуур ууж хэрэглэдэг эм болж байна. “Паксловид” нь “COVID-19”-өөр хөнгөн, дунд хэлбэрээр өвчилсөн, эмнэлэгт хэвтэн эмчлүүлэх, улмаар нас барах эрсдэл өндөр өвчтөнүүдэд зориулсан вирусний эсрэг эм юм гэж “Pfizer”, Хүнс, эмийн аюулгүй байдлын яам мэдээлжээ.

Тус яам “паксловид” эмийн аюулгүй байдал, үр дүнд үнэлгээ хийхдээ дотоодын болон хөндлөнгийн мэргэжилтнүүдийн ажлын хэсгийг хуралдуулсан бөгөөд дотуур ууж хэрэглэдэг уг эмийг өдгөө нүүрлээд буй эрүүл мэндийн хямралыг даван туулахад шаардлагатай гэсэн дүгнэлтэд хүрсэн байна.

Энэхүү эмийг халдварын эхний шинж тэмдэг илэрсэн, халдвар авснаа мэдсэн даруйд хэрэглэхийг зөвлөх боломжтой байна. Яамны мэдээлснээр, эмнэлзүйн туршилтаар “паксловид” хүндрэх эрсдэл өндөр өвчтөнүүдийн эмнэлэгт хэвтэн эмчлүүлэх, нас барах эрсдэлийг өндөр хувиар бууруулжээ.

Эмийг хүндээр өвчлөх өндөр эрсдэлтэй насанд хүрэгчдэд болон 12-оос дээш насны хүүхдүүдэд хэрэглэхийг зөвлөх бөгөөд “COVID-19”-ийн шинжилгээний хариу нь эерэг гарснаас таван хоногийн дотор ууж эхэлж, өдөрт хоёр ширхэгээр таван хоног хэрэглэнэ.

Хүнс, эмийн аюулгүй байдлын яам “паксловид”-ыг коронавирусний “омикрон” хувилбарын эсрэг үйлчилнэ гэж таамаглаж байна. Өнгөрсөн долоо хоногт АНУ-ын Хүнс, эмийн чанарын хяналтын газар /FDA/ уг эмэнд яаралтай журмаар хэрэглэх зөвшөөрөл олгосон юм.

Одоогоор БНСУ-д “COVID-19”-өөр халдварласан хүнд өвчтөнүүдийн эмчилгээнд Америкийн “Gilead Sciences” компанийн “ремдесивир” эмийг хэрэглэж байгаа юм. Мөн БНСУ-ын “Celltrion” эмийн компанид гарган авсан “рекирона” эмийг хүндээр өвчлөх эрсдэлийг бууруулахын тулд хэрэглэж байгаа ч эдгээрийн эмийн аль алийг судсаар тарьдаг байна.