Нүүрсээр ажилладаг хамгийн хуучны цахилгаан станц болох "Хонам" станц 12 дугаар сарын 31-нд бүрэн зогсоно гэж БНСУ-ын Үйлдвэр, худалдаа, эрчим хүчний яам мэдээлжээ.

Тус улсын өмнөд нутгийн Жолланамдо мужийн Ёсү хотод орших уг станцыг 1973 онд ашиглалтад оруулсан бөгөөд хаах бэлтгэл ажлыг таван жилийн өмнөөс эхлүүлсэн байна. 

2017 оноос сэргээгдэх эрчим хүчний эх үүсвэрт шилжих, агаар мандалд хортой бодисын ялгарлыг бууруулах Засгийн газрын төлөвлөгөөний дагуу тус улсад нүүрсээр ажилладаг хуучирсан цахилгаан станцуудыг ашиглалтаас гаргаж байгаа юм.

Дээрх яамнаас мэдээлснээр, Ёсү хотын цахилгаан станцын буйран дээр шингэрүүлсэн байгалийн хийн үйлдвэр байгуулна.