БНАСАУ-ын зүүн хойд нутагт Пунгери цөмийн туршилтын талбай байдаг Кильжу хошуунд 3.1 магнитудын хүчтэй газар хөдөлсөн тухай БНСУ-ын цаг уурын алба баасан гарагт мэдээлэв.

Тус албанаас мэдээлснээр, газар хөдлөлт 10 цаг 35 минутад 17 км-ийн гүнд бүртгэгдсэн байна. Газар хөдлөлт нь цөмийн төхөөрөмж дэлбэрснээс биш газрын царцсын бүтцийн /тектоник/ хөдөлгөөнөөс үүдэлтэй гэдгийг онцлон тэмдэглэжээ.

Цаг уурын албаны мэдээлснээр, тус бүс нутагт 1978 оноос хойш 2.0 ба түүнээс дээш магнитудын хүчтэй газар хөдлөлт 25 удаа болсон байна. Тэдгээрийн хамгийн хүчтэй нь 2017 оны есдүгээр сарын 23-нд бүртгэгдсэн бөгөөд 3.2 магнитудын хүчтэй байжээ.

2006-2017 онд Пунгери цөмийн туршилтын талбайд нийт зургаан цөмийн туршилт явуулжээ. Газар хөдлөлтийн станцуудын мэдээлснээр, эхнийхийг  Пэктусан галт уулын дор хийсэн бол үлдсэнийг нь Мантапсан уулын доорх хонгилуудад явуулсан байна. БНАСАУ-ын эрх баригчид Солонгосын хойгийг цөмийн зэвсгээс ангижруулах зорилгоор хийж буй сайн дурын арга хэмжээний хувиар 2018 онд уг талбайг хаасан билээ.