Нийслэлийн Баянгол дүүрэг тус дүүргийн ИТХ-ын даргын санаачилгаар боловсролын салбарыг дэмжих, боловсролын жишиг дүүрэг болох зорилт тавьжээ. Энэ хүрээнд “Багшийн чадвар бэхжүүлэх аяллын тэтгэлэгт уралдаан” зарласан байна. Уралдаанаар өнгөрсөн оны 10 дугаар сарын 5-наас 11 дүгээр сарын 20-ныг хүртэл дүүргийн ЕБС, СӨБ-ын байгууллагад ажилладаг нийт 200 гаруй багшаас “Дүүргийн хөгжилд багшийн оруулах хувь нэмэр” сэдвийн хүрээнд илтгэл хүлээн авч, шүүгчдийн бүрэлдэхүүн эхний  шатны шалгаруулалтын дүнг гаргаж 20 баг шалгараад байна.

Сүүлийн шатны шалгаруулалтад тэнцсэн 20 багшийн илтгэлийг сонсож, шүүгчдийн баг шилдэг 10 багшийг өнөөдөр сонгон шалгаруулав. Илтгэлийн уралдаанаас шалгарсан 10 багш БНСУ-ын боловсролын инноваци, сургалтын арга зүй, шилдэг туршлагаас суралцах 100 хувийн тэтгэлгийн эзэн болж байна.