Улсын хоёрдугаар төв эмнэлгийн Эд, эс, эрхтэн шилжүүлэн суулгах төв Монгол Улсын Ерөнхийлөгч У.Хүрэлсүхийн ивээл дор элэг шилжүүлэн суулгах мэс заслыг 2025 оны гуравдугаар сарын 8-нд амжилттай хийв. 

Уг мэс заслыг УХТЭ-ийн эмч нар Солонгосын “Самсунг медикал” төвийн Эрхтэн шилжүүлэн суулгах төвийн профессор Ким Жонгманаар удирдуулсан баг, УНТЭ болон ХСҮТ-ийн элэг шилжүүлэн суулгах төвийн эмч нарын зөвлөмжтэй хийжээ. Эрхтэн шилжүүлэн суулгах мэс засал хийлгүүлсэн үйлчлүүлэгчийн биеийн байдал сайжирч, эмнэлгээс гарч дараагийн хяналтад шилжсэн байна.

Мэс заслаар донорын элгийг Дурангийн мэс заслын аргаар авч шилжүүлэн суулгасан нь Монголд гурав дахь тохиолдол болсноороо эрхтэнээ бэлэглэж буй эмчлүүлэгчид зовуурь бага, эдгэрэлт хурдан, хөнөөл багатай байгааг албаныхан хэлэв.

Энэхүү мэс заслыг тус эмнэлэгт хийж эхэлснээр манай улсад тулгамдаж буй хүлээгдэл багасаж, гадаад орон руу зорих урсгалыг төдий чинээгээр бууруулж, эх орондоо дэлхийн чанартай тусламж үйлчилгээг авах олон давуу тал бүрдэж байна.

Цаашид УХТЭ-т Бөөр шилжүүлэн суулгах мэс заслыг хийхээр бэлтгэж ажлаа хангаж байгаа аж.

Улсын хоёрдугаар төв эмнэлгийн Эд, эс, эрхтэн шилжүүлэн суулгах төв 2022 оноос Элэг шилжүүлэн суулгах мэс заслыг эхлүүлэхээр бэлтгэж ажлаа хийсэн юм.