Франц, Герман, Итали улсууд Ливийн мөргөлдөөнд оролцогч талуудад хандан байлдааны ажиллагаагаа урьдчилсан болзолгүйгээр нэн даруй зогсоохыг уриаллаа. Энэ тухай гурван улсын Гадаад хэргийн яамны /ГХЯ/ пүрэв гарагт гаргасан хамтарсан мэдэгдэлд дурджээ.

Түүнчлэн Ливийн хэрэгт хөндлөнгөөс оролцохоо зогсоож, НҮБ-ын Аюулгүйн Зөвлөлийн шийдвэрээр урьд нь тогтоосон зэвсэг нийлүүлэх хоригийг бүрэн дагаж мөрдөхийг гадаадын оролцогчдод уриалжээ. Гурван улсын ГХЯ мөн гал зогсоох гэрээ байгуулах чиглэлээр Ливид дэмжлэг үзүүлэх НҮБ-ын ажиллагааны ивээл дор “5+5” хэлбэрээр /тал бүрээс таван төлөөлөгч/ зохион байгуулсан цэргийн хорооны хэлэлцээ түргэн дууссаныг сайшаасан байна.

Байлдааны ажиллагааг зогсоох нь "Ливи хоорондын улс төрийн яриа хэлэлцээг үр дүнтэй эхлүүлэхэд зайлшгүй шаардлагатай нөхцлийг бүрдүүлэх чухал элемент юм" гэж мэдэгдэлд онцлон тэмдэглэжээ.