БНХАУ-ын зүгээс барууны ардчилалд учирч буй аюул заналыг өндөр түвшинд хэлэлцэх улс төрийн зөвлөлдөх шинэ механизм бий болгосон тухай АНУ-ын Төрийн нарийн бичгийн дарга Майк Помпео Германы Маршалын сангаас Брюссельд зохион байгуулсан хурлын үеэр мэдэгдэв.

“Хятадын асуудлаарх улс төрийн яриа хэлэлцээний байнгын платформ байгуулах тухай ЕХ-ны Гадаад хэрэг, улс төрийн аюулгүй байдлын дээд төлөөлөгч Жозеп Боррелийн саналыг АНУ хүлээж авсныг та бүхэнд дуулгахад таатай байна” гэж тэрбээр цохон тэмдэглэсэн байна.

Түүний мэдэгдсэнээр, энэ нь Өрнөдийнхөнд учирч буй Хятадын аюул заналтай холбоотой сэтгэл түгшээсэн асуудлуудыг хэлэлцэх шинэ механизм болно. Энэхүү үйл явцын хамгийн чухал хэсэг нь “Хятадын Коммунист намын үгүй хийхийг хүсэж байгаа ардчилал, эрх чөлөөг хамгаалах зорилгоор” тагнуулын мэдээлэл солилцох ажиллагаа болох аж. "Эрх чөлөө ба авторитаризмын хооронд ямар ч буулт байх боломжгүй" гэж АНУ-ын Төрийн нарийн бичгийн дарга цохон тэмдэглэжээ.

Хэдэн долоо хоногийн дараа Помпео олон улсын шинэ форматын үндсэн зорилтуудыг хэлэлцэх эхний уулзалтад оролцохоор Европыг зорих төлөвтэй байна.

АНУ-ын Вашингтон хотод төвтэй Германы Маршаллын сан нь АНУ болон ХБНГУ-ын хамтарсан санаачилгаар 1972 онд байгуулагдсан аналитикийн төв юм. Энэхүү байгууллага нь АНУ-ын үнэт зүйл, ашиг сонирхлыг Европ төдийгүй дэлхий даяар суртчилан таниулах зорилготой барууны төрийн бус болон засгийн газрын бүтцийн тогтолцооны гол байгууллагуудын нэг юм.