Малайзын  эрх баригчид амны  хаалт  зүүхээс татгалзсан  хүмүүст  хорих шийтгэл  оноохоо анхааруулж байна. Одоогоор тус улсад олон нийтийн газар  амны  хаалт заавал зүүхийг үүрэг болгоогүй  байгаа ч ийм шийдвэр  гаргавал дагаж  мөрдөөгүй  иргэдэд 1 мянган ринггит  буюу  235  ам.долларын торгууль  ногдуулах  эсвэл  хэдэн сараар хорих  ял шийтгэл хүлээлгэхээр  төлөвлөсөн байна.

Тус улсад  халдварын нийт  тохиолдол  8800-г даваад  байгаа бөгөөд сүүлийн  өдрүүдэд  шинээр бүртгэгдэж  байгаа халдварын тоо  2 оронтой тооноос  буухгүй байгаа  юм.

Филиппиний  Ерөнхийлөгч  мөн амны хаалт зүүгээгүй иргэдээ  баривчилж  хорино хэмээн  анхааруулжээ. Тус улс "COVID-19"-ийн халдвараас болж нас барсан хүний тоогоороо  Зүүн Өмнөд Азид Индонезийн дараа  2-т бичигдэж байгаа юм. Өнгөрсөн  сараас халдвар  авсан, нас барсан хүний тоо  2 дахин нэмэгдсэн  тул эрх баригчид хорио цээрийн дэглэмийг чанд  баримтлахыг иргэддээ анхааруулсаар байна.