Японы “Toyota Motor” автомашин үйлдвэрлэгч компани коронавирусний цар тахлын улмаас буураад байсан автомашины борлуулалт сэргэж байгаатай холбоотойгоор энэ онд хамгийн олон буюу 9.2 сая орчим тээврийн хэрэгсэл үйлдвэрлэхээр төлөвлөж байна.

Энэ нь цар тахал дэгдэхээс өмнө буюу 2019 онд “Toyota”-гийн тогтоосон хамгийн өндөр үзүүлэлтийг /9.05 сая/ давах бөгөөд 2020 онд үйлдвэрлэсэн тээврийн хэрэгслийн тооноос нь 20 хувиар илүү ажээ.

Өнгөрсөн онд “Toyota” бусад автомашин үйлдвэрлэгчийн нэгэн адил цар тахлын нөлөөнд нэрвэгдсэн боловч өрсөлдөгчидтэйгээ харьцуулахад учирсан нөлөө нь бага байсантай холбоотойгоор тухайн ондоо автомашины борлуулалтаараа тэргүүлжээ.

Цар тахлын улмаас зарим оронд хатуу хөл хорио тогтоосны улмаас “Toyota”-гийн үйл ажиллагаа хумигдаж, 2020 оны дөрөвдүгээр сарын байдлаар үйлдвэрлэлийн хэмжээ нь өмнөх оны мөн үеийнхээс тал хувиар буураад байсан юм. 
Гэсэн хэдий ч 2020 оны сүүлээр БНХАУ, Хойд Америкийн зах зээлийн эрэлт нэмэгдсэнээр “Toyota”-гийн борлуулалт өссөн байна.