Өнөөдөр Сөүлийн их сургуулийн эмнэлгээс Мёнжи эмнэлэгт шилжин тусгаарлагдаж, эмчилгээ хийлгэж байсан Монгол Улсын иргэн 35 настай залуу өвчний улмаас нас барсан талаар БНСУ-ын мэдээллийн Ёнап агентлаг мэдээллээ. 

Бөөр, элэгний өвчлөлтэй, элэг шилжүүлэн суулгахаар БНСУ-ыг зориод байсан Монгол Улсын иргэн шинэ төрлийн коронавирусын халдвартай болох нь тогтоогдоод байсан юм. Өвчтөн Мёнжи эмнэлэгт хэвтэн эмчлүүлж байхдаа зүрхний шигдээсийн шинж тэмдэг хоёр ч удаа илэрсэн тухай мөн бичжээ. Мёнжи эмнэлгийн ажилтны мэдээлж байгаагаар, өвчтний нас барсан шалтгаан шинэ төрлийн корона вирустэй холбоотой эсэхийг шалгаж байгаа юм байна.

Энэ нь БНСУ-д бүртгэгдээд байгаа 11 дэх нас баралт бөгөөд гадаадын иргэний анхны тохиолдол юм.

Монголын талын албаны эх сурвалжаас тодруулах гэсэн боловч одоогоор албан ёсоор мэдээлэл ирээгүй байна гэв.

Эх сурвалж: https://www.yna.co.kr/view/AKR20200225170900060