АНУ-ын Үндэсний тагнуулын газраас ОХУ болон Иран улсыг АНУ-ын 2020 оны Ерөнхийлөгчийн сонгуулийн үр дүнд нөлөөлөхөөр оролдсон гэж мэдэгдсэн юм. Үүний дараа АНУ-ын Ерөнхийлөгч Жо Байдены засаг захиргаа ОХУ-ын эсрэг хориг арга хэмжээ авна гэж мэдэгдсэн билээ.

АНУ хориг арга хэмжээгээ авч эхэлсний эхнийх нь ОХУ-ыг зэвсэг экспортлох, импортлохыг бүрэн хориглосон улс орнуудын жагсаалтад оруулах шийдвэр байлаа. АНУ-ын Төрийн департаментын мэдээллээр энэ шийдвэр өнөөдөр буюу гуравдугаар сарын 18-наас хэрэгжиж эхэлнэ.

АНУ-ын Ерөнхийлөгч Жо Байден ABC телевизэд өгсөн ярилцлагадаа “Путин хийсэн хэргийнхээ төлөө өндөр үнэ төлөх болно” гэжээ. Тэрбээр ОХУ-ын Ерөнхийлөгч Владимир Путиныг АНУ-ын Ерөнхийлөгчийн сонгуульд хөндлөнгөөс оролцох оролдлого хийсэн гэж үзэж байгаа аж.

Жо Байден Путиний эсрэг авах гэж буй арга хэмжээнүүдийхээ талаар тодорхой яриагүй ч Оросын Ерөнхийлөгчийн хийсэн үйлийн үр дагавар удахгүй мэдэгдэнэ гэдгийг хэлжээ.

Түүнчлэн сэтгүүлч түүнээс “Та  Владимир Путиныг мэднэ. Түүнийг алуурчин гэж бодож байна уу” гэж асуухад Жо Байден “Тийм” гэж хариулжээ.