АНУ-ын Флорида муж улсад 12 давхар орон сууцны барилга нурсны улмаас амиа алдсан хүний тоо 18 болж нэмэгджээ.

“Хамгийн сүүлд хийсэн мэдээллээс хойш харамсалтай нь бид дөрөв, 10 настай хүүхдүүдийн хоёр цогцсыг олсон. Амиа алдагсдын тоо 18 боллоо. 145 хүний ​​хувь заяа тодорхойгүй хэвээр байна" гэж Майами-Дейд тойргийн захирагч Даниэлла-Ливайн Кава мэдээлсэн байна.

Флорида муж улсын Майами хотын ойролцоох Сурфсайд хотод зургаадугаар сарын 24-нд шилжих шөнө 12 давхар орон сууцны барилга нурсан юм. Уг барилгад нийт 135 айлын орон сууц байрлаж байсны 55 нь нуржээ.

Нурсан барилгыг 40 жилийн өмнө барьжээ. 2018 онд уг олон давхар барилгад хийсэн шалгалтын үеэр мэргэжилтнүүд “ноцтой эвдрэл гэмтэл гарсан байсныг” илрүүлж байжээ.

АНУ-ын Ерөнхийлөгч Жо Байден эмгэнэлт явдал болсонтой холбогдуулан Флорида муж улсад онцгой байдал зарласан байна.