Цэргийн тагнуулын хиймэл дагуул хөөргөснийх нь дараа Солонгос хоорондын цэргийн хурцадмал байдлыг намжаах тухай хэлэлцээрийн зарим заалтын хэрэгжилтийг Өмнөд Солонгосын тал түр зогсоосны хариуд Умард Солонгос тус хэлэлцээрийн дагуу зогсоогоод байсан цэргийн бүх үйл ажиллагаагаа нэн даруй сэргээнэ гэж пүрэв гарагт мэдэгдлээ.

Умард Солонгосын Батлан​​ хамгаалах яам цаашид уг хэлэлцээрт "хэзээ ч захирагдахгүй" гэж мэдэгдэж, хилийн дагуух хурцадмал байдлыг бууруулах хэд хэдэн арга хэмжээ авах тухай хэлэлцээрийг даруй цуцалж байна гээд өмнөдийнхөн шийдвэрийнхээ хариуцлагыг “бүрэн хүлээх ёстой” гэж анхааруулсан байна.

"Бид Умард-Өмнөдийн цэргийн хэлэлцээрийн дагуу зогсоогоод байсан цэргийн бүх үйл ажиллагааг нэн даруй сэргээнэ" гэж БНАСАУ-ын төрийн төв мэдээллийн агентлагаас (KCNA) гаргасан мэдэгдэлд дурджээ.
"Бид газар, далай, агаар зэрэг бүх салбарт цэргийн хурцадмал байдал, мөргөлдөөнөөс сэргийлэхийн тулд авсан цэргийн арга хэмжээг цуцалж, хилийн шугамын дагуу зэвсэгт хүчний хүчин чадлыг нэмэгдүүлж, шинэ төрлийн цэргийн техник хэрэгслийг нэмж байрлуулна" гэж  KCNA-гийн мэдэгдэлд дурдсан байна.

Умард Солонгос мягмар гаргийн шөнө “Маллигён-1” цэргийн тагнуулын хиймэл дагуулыг шинэ төрлийн "Чоллима-1" пуужингаар хөөргөсний дараа Өмнөдийн тал хоёр Солонгосын хооронд 2018 онд байгуулсан цэргийн хэлэлцээрийн зарим заалтын хэрэгжилтийг түр зогсоож, хилийн ойролцоох тагнуул, тандалтын ажиллагааг нэн даруй сэргээх боломжийг Сөүлд олгосон юм.

Ерөнхийлөгч асан Мүн Жэ Иний либерал засаглалын үед хоёр Солонгосын хооронд санамсаргүй мөргөлдөөн гарахаас сэргийлэхийн тулд хил орчимд хамгаалалтын бүс болон нислэггүй бүс байгуулахыг уриалж 2018 оны есдүгээр сарын 19-ний өдөр уг хэлэлцээрт гарын үсэг зурсан билээ.

Өмнөд Солонгосын Батлан​​ хамгаалах яамнаас мэдээлснээр, Пёньян өнгөрсөн оны эцэс хүртэл тус хэлэлцээрийг нийт 17 удаа зөрчсөн бөгөөд өнгөрсөн онд л гэхэд 15 зөрчил гаргасан байна. Батлан​​ хамгаалахын сайд Шин Вон Сик хэлэлцээрийг түр зогсоохыг уриалж, энэ хэлэлцээр нь Өмнөд Солонгосын армийн агаараас ажиглах чадавхыг ихээхэн хязгаарлаж байна гэж мэдэгджээ.