Өнөөдрийн байдлаар БНСУ-д коронавирусийн  халдвар авсан иргэний тоо 8,236-д хүрээд байна. Мөн Солонгос улсад маскны олдоц багасаж иргэдэд регистрийн дугаараар маск борлуулж эхлээд байгаа юм. Тэгвэл сүүлийн үед бусдын регистрийн дугаарыг ашиглан маск худалдаж авсан тохиолдол гарах болсон байна. Гванжү Намбү цагдаагийн газраас мэдэгдэж буйгаар энэ сарын 14-ний өдрийн 12 цаг 50 минутын үед нэгэн эмийн сангаас иргэн А /57 настай/маск худалдаж авах гэсэн боловч хэдийн өөрийнх нь регистрийн дугаарыг нь ашиглан өөр хүн маск худалдаж авсан болохыг мэдсэн байна. Ингээд А цагдаад мэдэгдсэн бөгөөд цагдаагийн газраас иргэн А-гын регистрийн дугаарыг ашиглан маск худалдан авсан иргэнийг хайж эхэлжээ. Мөн үүнтэй төстэй хэрэг өнгөрсөн 12-ны өдөр гарсан байна. Тиймээс цагдаагийн газраас бусдын регистрийн дугаарыг ашиглан маск худалдаж авсан тохиолдолд арга хэмжээ авахаа мэдэгджээ. Одоогийн байдлаар Солонгос улсын иргэд өөрсдийн регистрийн дугаарын төгсгөлийн оронгоор маск худалдаж авч байгаа юм. Регистрийн дугаар нь 1, 6-аар төгссөн бол даваа гараг, 2,7-оор төгссөн бол мягмар гараг, 3 болон 8-аар төгссөн бол лхагва гараг, 4, 9-өөр төгссөн бол пүрэв гараг, 5,0-ээр төгссөн бол баасан гарагт очиж маск худалдаж авах боломжтой юм.