“БНСУ-д үрэвсэлт синдромтой төстэй өвчин туссан хоёр хүүхэд эдгэрч, биеийн байдал нь сайн байна. Хүүхдүүдийн нэг нь эмнэлгээс гарсан” гэж тус улсын Нийгмийн эрүүл мэндийн агентлаг өнөөдөр мэдээллээ.

Сөүл хотод хоёр хүүхдээс олон эрхтэн тогтолцооны үрэвсэлт синдром илэрсэн нь манай улсад бүртгэгдсэн анхны ийм тохиолдлууд боллоо гэж БНСУ-ын Өвчинд хяналт тавих, урьдчилан сэргийлэх төв мягмар гарагт мэдээлсэн байна.

Дэлхийн олон оронд олон эрхтэн тогтолцооны үрэвсэлт синдромын тохиолдол өнгөрсөн сараас бүртгэгдэж эхэлсэнтэй холбоотойгоор уг өвчнийг шинэ коронавирусний халдвартай холбоотой байж болзошгүй хэмээн үзэж байгаа юм.

Өвчинд хяналт тавих, урьдчилан сэргийлэх төвийн мэдээлснээр, 11 настай хүү эдгэрч, эмнэлгээс гарснаас гадна дөрвөн настай охины биеийн байдал мөн сайжирч байгаа аж. “Полимеразын гинжин урвалын шинжилгээгээр тэднээс халдвар илрээгүй боловч хүүхдүүд өмнө нь халдвар авсан эсэхийг үүгээр тогтоох боломжгүй. Нарийвчилсан шинжилгээний хариу ирэх долоо хоногт гарна” гэж мэргэжилтнүүд мэдээлжээ.

Европ, АНУ-д өнгөрсөн дөрөвдүгээр сараас олон эрхтэн тогтолцооны үрэвсэлт синдромын тохиолдлууд бүртгэгдэж эхэлсэн бөгөөд сүүлийн мэдээллээр нийт 13 оронд ийм тохиолдол илэрсэн байна. Мөн үл мэдэгдэх энэ өвчний шинж тэмдгүүд нь бага насны хүүхдүүдэд түгээмэл тохиолдож, эрхтнүүдийг үрэвсүүлдэг Кавасаки өвчнийхтэй төстэй байгаа ажээ.