Хүнд гэмтлийн улмаас жонидан зиндаа хүртэл унасан ч дээд зиндаанд эргэн гарч чадсан озэки асан Тэрүнофүжитэй Японы NHK телевиз онлайн ярилцлага хийжээ.

-Дахин дээд зиндаанд барилдах болсон сэтгэгдэл ямар байна?

-Доор арай л удаан барилдчихлаа гэсэн бодол төрдөг.

-Өвдөгний хүнд гэмтлийн улмаас зиндаа буурсан.

-Дээр нь чихрийн өвчин, элэгний С вирус, бөөр гээд гурван өвчин давхацсан юм. Яаж ч хичээгээд ямар ч бяр чадал гарахгүй, булчин ч сулраад эхэлсэн. Бага багаар эмчлүүлээд барилдсаар байлаа.

-Больё, зодог тайлъя гэж гэж бодож байв уу?

-Үнэнийг хэлэхэд озэки цолоо алдчихаад оякатадаа “Зодог тайлъя” гэж таван удаа хэлсэн.

-Ояката юу гэж хариулсан бэ?

-Багш эхлээд өвчнөө эдгээчих. Эдгэсний чинь дараа энэ сэдвээр ярилцъя гэж хэлсэн.

-Дээд зиндаанд дахин дэвшихэд ояката их үүрэгтэй байж дээ.

-Үнэхээр тийм.

-Башёгийн түрүү бөх, озэки жониданд унаж байсан түүх байхгүй.

-Озэки болоод ёкозүна цол хүртэх найдвартай бөхөд тооцогдож байсан болохоор нэр хүндийн асуудал ч байлаа. Энэ нэр хүнд, бардам зангаа хаяж, жониданд барилдаж чадах болов уу гэж бодсон. Хаяж чадаагүй болохоор сэтгэлд маш хүнд байсан. Дагуул, туслах бөх байхгүй. Ёстой л тэгээс дахин эхэлсэн дээ. Нэг танил минь “Чи өөрөө л бодоод шаналаад байгаа болохоос бусад хүн чамайг озэки асан яагаад ингэж доор барилдаж байна гэж огт бодохгүй байгаа. Бүгд л Тэрүнофүжи зүтгэж байна даа гэж ярьж байна” гэж хэлсэн юм.  

-Одоо ямар бэлтгэл хийж байна?

-Биеийн дээд хэсгээ голлон, хүчний дасгал голдуу хийж байна. Харин өвдөг одоогийн байдлаар 30 хувь л эдгэсэн. Ийм байдалтай л дахин дээд зиндаанд дэвшлээ. Дээд зиндаа хэцүү тул улам сайн бэлтгэл хийх хэрэгтэй.  

-Сүмочдыг гадуур гарахыг хориглосон хэвээр байгаа. Гэртээ юу хийж байна?

-Хуучны видео бичлэг үзээд л. Дасгалын дугуй худалдаж аваад өдөрт нэг цаг гаруй дасгал хийдэг.

-Та башёд түрүүлж байсан, озэки болсон бөх. Одоо өмнөө тавьж байгаа зорилгыг тань сонирхвол?

-Дээд зиндаанд гарч чадсаных одоо дахин унахгүй байх зорилготой. Ахмад бөх болчхоогүй байгаа тул залуу бөхчүүдийн нэгэн адил дохён дээр бужигнуулан, үзэж тарах хүсэлтэй байна.

-Эцэст нь фэнүүддээ хандан, үг хэлээч.

-Коронавирусний халдвартай хүнд хэцүү үе болж байна. Бөхчүүд бид бүгд ирэх тэмцээнд оролцох гээд хичээн зүтгэж, бэлтгэлээ базааж байна. Долоодугаар сарын тэмцээнд эргэн уулзацгаая.