БНАСАУ-ын Төрийн Зөвлөлийн дарга Ким Жөн Ун БНСУ-ын эсрэг чиглэсэн цэргийн ажиллагаа явуулах төлөвлөгөөг хэрэгжүүлэх хугацааг хойшлуулжээ. Солонгосын Хөдөлмөрийн намын Цэргийн төв комиссын 5 дугаар чуулганы цахим хэлбэрээр явуулсан урьдчилсан хуралдааны үеэр тэрбээр ийм шийдвэр гаргасныг Солонгосын төв цахилгаан мэдээний агентлаг уламжилжээ.

“Солонгосын Хөдөлмөрийн намын Цэргийн төв комиссын урьдчилсан хуралдааны үеэр сүүлийн үед үүссэн нөхцөл байдалд үнэлгээ өгч, Солонгосын ардын армийн Ерөнхий штабын танилцуулсан Өмнөдийн эсрэг чиглэсэн цэргийн ажиллагааны төлөвлөгөөг хойшлуулжээ” хэмээн тус агентлаг мэдээлжээ.

Энэ хуралдааны үеэр Солонгосын Хөдөлмөрийн намын Цэргийн төв комиссын 5 дугаар чуулганы хүрээнд авч хэлэлцэх цэргийн бодлогын гол төслүүдийг хэлэлцжээ.

“Хуралдааны үеэр танилцуулах илтгэл, тогтоолууд болон цаашид улс орны цэргийн хүчийг бэхжүүлэхэд авч хэрэгжүүлэх арга хэмжээг тусгасан баримт бичгүүдийг судалжээ” гэж мэдэгдэлд дурдсан байна.

Пёньян хотын хэвлэлийн газрууд, хэвлэх үйлдвэрүүд БНСУ-ын нутаг дэвсгэр рүү илгээх 12 сая ухуулах хуудас хэвлэсэн тухай Солонгосын төв цахилгаан мэдээний агентлаг /KCNA/ 7 дугаар сарын 22-нд мэдээлсэн юм. Түүнчлэн БНАСАУ-ын бусад хотын хэвлэх үйлдвэрүүд нэмж хэдэн сая ухуулах хуудас хэвлэхээр төлөвлөж байгаагийн сацуу суртал ухуулгын материалуудыг тараах тоног төхөөрөмжийг бэлтгэж дууссаныг мэдээлжээ. Тодруулбал, ухуулах хуудсуудыг тараахад 3000 гаруй агаарын бөмбөлөг ашиглах аж.

Зургаадугаар сарын 16-нд БНАСАУ Кэсон хот дахь Солонгос хоорондын хамтарсан төлөөлөгчийн газрыг дэлбэлсэн бөгөөд Өмнөд Солонгосын идэвхтнүүд суртал ухуулгын хуудсууд тараасны хариуд ийм үйлдэл хийсэн гэж мэдэгдсэн билээ. Солонгосын ардын армийн анги нэгтгэлүүдийг Кымгансан, Кэсон орчимд байрлуулах, гэрээний дагуу цэргээ татсан цэрэггүй бүсийн илүү аюултай бүс дэх харуулын байруудын үйл ажиллагааг сэргээх, Өмнөдтэй залгаа хил орчимд бүх төрлийн цэргийн сургуулиа явуулж эхлэхээр төлөвлөж байгаагаа БНАСАУ-ын Ерөнхий штаб мэдэгдсэний дараа хоёр Солонгосын харилцаанд үүссэн хурцадмал байдал улам даамжирсан юм.