Төрийн өмчит “Эрдэнэс Монгол” нэгдлийн Төлөөлөн удирдах  зөвлөлийн ээлжит хуралдаанаар П.Ганхүүг чөлөөлж, Д.Хаянхярвааг гүйцэтгэх захирлаар томилох шийдвэр гаргажээ.

“Эрдэнэс Монгол” нэгдлийг Засгийн газрын 2006 оны арваннэгдүгээр сарын 15-ны өдрийн “Төрийн өмчит хуулийн этгээд үүсгэн байгуулах тухай” тогтоолоор байгуулагдах нөхцөл нь бүрдэж байсан юм.

Улмаар 2007 оны хоёрдугаар сарын 22-ны өдөр Төрийн өмчийн хороо /хуучнаар/-ны 52 дугаар тогтоолын үндэслэн стратегийн ач холбогдол бүхий ашигт малтмалын орд газруудад үйл ажиллагаа эрхлэх зориулалтаар байгуулагдсан түүхтэй.

“Эрдэнэс Монгол” нэгдлийн гүйцэтгэх захирлын албаа хүлээлгэн өгсөн П.Ганхүү нь 2018 онд тус нэгдлийн гүйцэтгэх захирлаар томилогдсон юм.

“Эрдэнэс Монгол” нэгдэл өнгөрсөн онд 265 тэрбумын орлоготой, 5.8 тэрбумын цэвэр ашигтай ажилласан байна.

Одоогоор тус нэгдэлд 13 охин компани, хоёр төслийн нэгж харьяалагдан ажиллаж буй бөгөөд нийт хөрөнгө нь 11.9 их наяд төгрөгөөр хэмжигдэж буй юм.