“Бээжин-2022” өвлийн олимпын эрхийн төлөө өрсөлдөх Монголын цанын шигшээ баг, дасгалжуулагч, ОУХМ Б.Энх-Амгалангийн удирдлага дор Финланд улсыг зорилоо. Манай улсын багийн бүрэлдэхүүнд Б.Ачбадрах, Д.Мөнхгэрэл, О.Золбаяр, Б.Ганбаяр, А.Энхтуул, Б.Номин-Эрдэнэ, Б.Номуунаа  нарын тамирчин багтжээ. Тэд Финландын Вуокатти цанын баазад бэлтгэлээ ханган, Олон улсын цанын холбоо( FIS)-ны олимпын оноо олгох албан ёсны гурван уралдаанд хурд сорьсны дараа ирэх сарын 24-нд Германы Оберсхдорф хотноо эхлэх дэлхийн аварга шалгаруулах 42 дахь удаагийн тэмцээнд оролцоно.

Ташрамд дуулгахад, Монголын гүйлтийн  цаначид “Инсбрук - 1962” дэлхийн аварга шалгаруулах тэмцээнээс анхны гараагаа эхэлж, хоёр жилийн дараа “Инсбрук - 1964” олимпын наадамд уралдсанаас хойш 12 удаагийн цагаан олимпод оролцсон түүхтэй. Монголын цанын холбоо нь 1958 онд байгуулагдсан бөгөөд ерөнхийлөгчөөр Р.Хатан, ерөнхий нарийн бичгийн даргаар Б.Гэрэлт-Од нар ажилладаг юм. Түүнчлэн цанын шигшээ багийн гурван тамирчин ОУОХ-ны тэтгэлэгт хөтөлбөрт хамрагддаг.