ЭМЯ-ны хэлтсийн дарга Г.Болдмаа коронавируст халдвар (Covid-19)-ын нөхцөл байдлын талаарх өнөөдрийн хэвлэлийн хурлын үеэр дараах мэдээллийг өглөө.

Тэрбээр "Одоогоор 279,069 хүн коронавирусний эсрэг вакцинд хамрагдаж, зорилтот бүлгийн хүмүүсийнхээ 55 хувийг коронавирусний эхний тунгаар дархлаажуулаад байна. Өөрөөр хэлбэл, 18-аас дээш насны долоон хүн тутмын нэгийг дархлаажуулсан.

Энэ нь Номхон далайн баруун эргийн бүс болон дэлхий дахины үзүүлэлтээр дээгүүр байр эзэлж буй үзүүлэлт юм. Вакцины хангамжийн хувьд дөрөвдүгээр сард нийт 900,000 хүн тун БНХАУ-ын Синофарм үйлдвэрийн вакцин орж ирэх юм. Үүний зэрэгцээ ОХУ-ын Спутник V вакцин нэг сая хүн тун ирэх тул дархлаажуулалтынхаа үйл ажиллагааг маш өргөн хүрээтэйгээр цааш үргэлжлүүлнэ. Түүнээс гадна ирэх сарын 10-наас Синофармын, 15-наас АстраЗенека вакцины хоёр дахь давтан тунгууд хийгдэж эхэлнэ. Вакцинд хамрагдсан хүмүүсийг хувиар үзвэл, эрүүл мэндийн ажилчид, хариу арга хэмжээний баг, боловсролын байгууллага, худалдааны байгууллага, үйл ажиллагааг тасралтгүй үргэлжлүүлэх аж ахуйн нэгж, байгууллагын ажилчид вакцинд хамрагдсан хувь нь өндөр байна. Одоогоор 50-аас дээш насны иргэд вакцинд хамрагдаж байгаа. Мөн 18-25 насны залуусыг вакцинд хамруулахаар энэ долоо хоногт бэлтгэл ажлаа хийж байна" гэлээ. 

Эх сурвалж: ХӨСҮТ