БНСУ-д коронавирусийн халдвар өдөр ирэх тусам нэмэгдсээр байна. Өнөөдрийн /2020.03.05/ байдлаар коронавирусийн халдвар авсан 5,766 иргэн байгаа бол 35 иргэн нас барж 21,810 иргэн шинжилгээний хариугаа хүлээж байгаа юм. Үүнтэй холбоотойгоор маскны хэрэгцээ улам нэмэгдэж, иргэд маск авахын тулд 5-аас 6 цаг дугаарлаж байгаа аж. Өчигдөр /2020.03.04/ Илсан хотын “Costco” худалдааны төвийн гадаа маск авах дугаар авахын тулд 21 цагаас эхлэн 700 гаруй иргэн дараалал үүсгэсэн байна. Учир нь өнөөдөр /2020.03.05/уг худалдааны төвд 500 гаруй хайрцаг маск худалдаалах бөгөөд иргэд маск авах дугаараа авахын тулд ингэж дараалал үүсгэжээ. Түүнчлэн эмийн сангуудад зарагдаж байгаа маскнаас нэг хүн 2-оос 5 ширхгийг л авах боломжтой бол “Costco” худалдааны төв гишүүнчлэлийн үнэмлэхтэй худалдан авагчдадаа нэг хайрцаг/ 20-оос 30 ширхэг/ маск худалдан авах боломж олгож байгаа нь ингэж оочер дараалал үүсгэхэд хүргэсэн байна.

Маск худалдаж авахаар зогсож байсан 51 настай иргэн А “Цаг агаар ийм хүйтэн байгаа  үед 700 гаруй хүмүүс маск худалдаж авахын тулд дугаарлан хүлээж байгааг харахад үнэхээр харамсалтай байна. Энд байгаа хүмүүс үнэ цэнэтэй цаг хугацаагаа хүйтэнд дугаарлаж өнгөрүүлж байгаа нь гэр бүлийнхэндээ нэг ч болтугай масктай харихын тулд хүйтэнд даарч хөрөн дугаарлаж байна. Засгийн газраас иргэдэд маск хүргэхийн тулд арга хэмжээ авч байгаа хэмээн мэдэгдсэн хэдий ч бодит байдал дээр үнэхээр хүрэлцэхгүй байна. Мөн хүйтэнд дугаарлаж байгаа иргэд дунд хэдийн халуурах ханиалгах шинж тэмдэгтэй хүмүүс ч байгаа, ингэж удаан хугацаанд хүйтэнд зогсох нь эсрэгээрээ эрүүл мэндийн хувьд асуудал үүсэх вий хэмээн айж байна” гэжээ. Ийнхүү олон цагаар зогссон иргэд өнөөдөр өглөөний 10 цагаас өдрийн 13 цаг хүртэл хүлээлгийн дугаарын дагуу маск худалдаж авах боломжтой юм.