Газар чөлөөлөлтийн нөхөн төлбөрт нийт 286.4 тэрбум төгрөг нөхөн олгохоор тусгасан байна.  

Энэ нь урьд өмнөх онуудын төлөгдөөгүй нөхөн төлбөртэй хамтатгасан төлбөр гэдгийг нийслэлийн Хот байгуулалтын асуудал хариуцсан төслүүдийн удирдагч Б.Сүхбаатар нийслэлийн газар зохион байгуулалтын энэ оны төлөвлөгөөний биелэлт, 2022 оны төлөвлөгөөний төслийг танилцуулах үеэрээ дурдав.

2022 оны төлөвлөгөөний төсөлд 6 яам, УИХ-ын 4 гишүүн, нийт 941 санал ирүүлснийг судалжээ. Газар зохион байгуулалтын төлөвлөгөөнд тусгаснаар ирэх онд  газрын суурь үнэлгээнд өөрчлөлт оруулах аж. Газрын үнэлгээ бүсчлэлийг дүүргүүд тогтоодог байсныг болиулж, нийслэл тогтоодог болж байгаа бөгөөд газрын дуудлага худалдааг үргэлжлүүлэн, дуудлага худалдаагүй өмчлүүлсэн газарт дуудлага худалдааны төлбөр нөхөж авахаар заажээ.

Эдийн засгаа тэлэх, дагуул хотуудыг хөгжүүлэхтэй  холбоотой зарим албан байгууллага, төрийн болон төсөвт байгууллагын хэрэгцээнд эзэмшиж буй газруудыг орон нутгийн тусгай хэрэгцээнд татах ажлыг ирэх оны төлөвлөгөөнд  тусгах нь зүйтэй гэсэн саналыг Засаг даргын зөвлөлийн гишүүн тодотгож байв.  

Газрын алба цахимжсан нь энэ оны онцлох үйл явдлын нэг гэдгийг Нийслэлийн Засаг дарга бөгөөд Улаанбаатар хотын захирагч Д.Сумъяабазар тодотгоод, ирэх онд газрын төлбөрийн орлогыг төвлөрүүлэхэ онцгойлон анхаарч, хот хөгжүүлэх санд төвлөрүүлэх хөрөнгө, мөнгийг зохих ёсоор нь авдаг, орсон орлогоо хотын газар төлөвлөлт, газар зохион байгуулалтад зориулдаг байх учиртайг санууллаа.