БНАСАУ-ыг үүсгэн байгуулагч, тус улсын анхны Ерөнхийлөгч Ким Ир Сений дүү Ким Ён Жу 101 насандаа таалал төгсжээ. Энэ талаар “Yonhap” агентлаг Умард Солонгосын хэвлэлүүдээс эш татан мэдээлсэн байна. 

Тус агентлагийн мэдээлснээр, БНАСАУ-ын удирдагч Ким Жөн Ун мягмар гарагт цэцэг илгээн, эмгэнэл илэрхийлжээ. Ким Ён Жу хэзээ нас барсан талаарх мэдээлэл гараагүй байна.

Ким Ён Жу 1920 онд төржээ. Тэрбээр Ким Ир Сенийг төрийн эрхэнд гарсны дараа хэд хэдэн удирдах албан тушаал хашиж байсан байна. Тухайлбал, Солонгосын Хөдөлмөрийн намын нөлөө бүхий газар болох Зохион байгуулалтын хэлтсийг удирдаж байсан ч 1973 онд түүнийг Ким Ир Сений хүү Ким Жон Илээр сольжээ. 1993 онд Ким Ён Жу улс төрд эргэн ирж, Улс төрийн товчооны гишүүн болсон бол 1998 оноос хойш Ардын дээд хурлын (парламент) байнгын хорооны хүндэт орлогч даргын албан тушаалыг хашжээ. 

"Нам, төрийн чухал албан тушаал хашиж байсан Ким Ён Жу нь Хөдөлмөрийн намын үзэл баримтлалыг хэрэгжүүлэхийн төлөө үнэнчээр зүтгэж, социалист бүтээн байгуулалтыг эрчимжүүлэх, солонгос маягийн нийгмийн тогтолцоог хөгжүүлэхэд хувь нэмрээ оруулсан" гэж БНАСАУ-ын төв мэдээний агентлаг онцлон тэмдэглэсэн байна.