Улаанбаатар хотод амьдардаг солонгос иргэн монголчуудад зодуулсан мэдээ өчигдөр БНСУ-ын MBC телевизээр цацагдлаа. Хохирогч “Энэ сарын эхээр Өмнөд Солонгост монгол охин хүчирхийлэлд өртсөний өс хонзон байж магадгүй” гэж мэдүүлжээ.

Энэ сарын 16-нд MBC телевизээр гарсан мэдээнд “Энэ сарын 6-ны өдөр Улаанбаатар хотын захад орших нэгэн зочид буудлын дэргэд хэрэг гарчээ. Замаар алхаж явсан солонгос эрэгтэй А-г нэгэн залуу гүйцэн ирж, машины зогсоолд аваачин, хэдүүлээ нийлэн зодсон байна. А бол солонгос эзэнтэй зочид буудлын ажилтан. Тэрээр гар утсаараа тусламж дуудах гэсэн ч таван монгол залуу түүнийг машины арын суудалд түлхэн оруулж зоджээ. Зочид буудлаас солонгос 3 хүн гарч ирсэн ч тэднийг мөн зодсон байна. Хохирогч нүд, чихэндээ цохиулсан, хамрын яс хугарч, мэс засал хийлгэсэн” гэж мэдүүлсэн байна. Мөн “Таван монголын дунд нэг нь цагдаагийн хувцастай, бичиг баримтаа гаргаж байсан. Гомдол мэдүүлсэн Цагдаагийн газрынхан ч огт тоогоогүй” гэж хэлжээ. Яагаад хүчирхийлэл үйлдсэн шалтгаан тодорхойгүй. Гэхдээ хохирогчид Өмнөд Солонгост зодуулсан монгол охинтой холбоотой байх гэж сэжиглэж байгаагаа ярьжээ. “Учир нь тэр хэргээс хойш Монголд солонгос хүнд хандах хандлага муу болсон” гэж  Монголд амьдардаг Б хэмээх солонгос иргэн хэллээ. БНСУ-ын ГХЯ-ны төлөөлөгч “Монгол охины хэрэг гарсны дараа байдал эвгүй болсон ч удалгүй засарсан. Бид энэ хэргийг шударга үнэн шүүхийг Монголын цагдаагийн газарт хүсэлт тавьсан байгаа” гэж дурджээ.