БНСУ, АНУ, Япон энэ сард зохион байгуулахаар товлоод байсан Батлан хамгаалахын сайд нарын гурван талт уулзалтаа хойшлуулсан талаар Сөүлийн Батлан хамгаалах яамнаас өнөөдөр мэдээлжээ.

Гурван орон Хавайд ирэх пүрэв гарагт болох уулзалтыг “омикрон” хувилбарын тархалтын улмаас хойшлуулсан гэж Японы олон нийтийн хэвлэл мэдээллийн хэрэгслүүд урьд нь мэдээлээд байжээ.

“Уулзалтын дараагийн товын талаар хараахан хэлэлцээгүй байна” гэж Батлан хамгаалах яамны хэвлэлийн төлөөлөгчийн орлогч Мүн Хун Сик мэдэгдсэн байна.

Энэ долоо хоногийн эхээр АНУ-ын Батлан хамгаалахын сайд Ллойд Остин “COVID-19”-ийн шинжилгээний хариугаа эерэг гарсан талаар мэдээлсэн юм.

БНСУ, АНУ, Япон Батлан хамгаалахын сайд нар хамгийн сүүлд 2019 оны 11 дүгээр сард Тайландын нийслэл Бангкок хотноо болсон Зүүн Өмнөд Азийн улсуудын холбооны аюулгүй байдлын хэлэлцээний хүрээнд уулзжээ.