Япон, АНУ, БНСУ-ын Гадаад хэргийн дэд сайд нар БНАСАУ баллистик пуужингийн туршилтыг удаа дараа явуулж байгааг зэмлэн буруушаагаад, гурван талын аюулгүй байдлын хамтын ажиллагаагаа бэхжүүлэхээр тохиролцжээ.

Японы Гадаад хэргийн дэд сайд Мори Такэо, АНУ-ын Төрийн нарийн бичгийн даргын орлогч Венди Шерман, БНСУ-ын Гадаад хэргийн дэд сайд Чо Хюн Дун нар Сөүл хотноо өнөөдөр уулзжээ. Талууд өнгөрсөн оны 11 дүгээр сараас хойш анх удаагаа биечлэн уулзсан нь энэ юм.

Энэхүү хэлэлцээний дараа гаргасан хамтарсан мэдэгдэлд БНАСАУ-ыг эрс зэмлэн буруушаагаад, дэлхийн энх тайван, аюулгүй байдалд аюул учруулсан үйлдлээ нэн даруй зогсоохыг тус улсад хандан уриалсан байна.

Вашингтоны төлөөлөгчдийн хувьд БНАСАУ цөмийн долоо дахь туршилтаа хэзээ ч явуулж болзошгүй гэдгийг анхааруулаад байгаа юм.

Хамтарсан мэдэгдэлд мөн В.Шерман Япон, БНСУ-ыг батлан хамгаалах, тэр дундаа тогтоон барих арга хэмжээ авах тухай Вашингтоны “тууштай амлалтыг” дахин нотолсон талаар дурджээ.

Мөн Гадаад хэргийн дэд сайд нар хэлэлцээний ширээнд эргэн суухыг Пёньянд уриалаад, нухацтай, тогтвортой яриа хэлэлцээ хийх зам нээлттэй хэвээр байгааг цохон тэмдэглэсэн байна.

Талууд мөн Украинд дэмжлэг үзүүлэхэд хамтын хүчин чармайлт гаргах, чөлөөт, нээлттэй Энэтхэг, Номхон далайн бүсийг цогцлоох тэргүүтэй бүс нутаг хийгээд дэлхий дахинд тулгамдаж буй асуудлуудын талаар хэлэлцжээ.

Уулзалтын дараа М.Такэо, талууд бүс нутгийн тогтоон барих хүчийг бэхжүүлэх, БНАСАУ-ыг цөмийн зэвсгээс бүрэн ангижруулахад дипломат хүчин чармайлт тавих чиглэлд илүү нягт хамтран ажиллахаар тохиролцсон талаар сэтгүүлчдэд мэдээлсэн байна. 

В.Шерман хэлэхдээ, АНУ, БНСУ, Япон улс БНАСАУ-ын асуудлаар бүрэн хийгээд нягт хамтран ажиллаж байна хэмээгээд, өдөөн хатгасан үйлдлүүдээ зогсоож, дипломат чиг шугамыг тууштай баримтлахыг БНАСАУ-д уриалжээ.

Чо Хюн Дуны хувьд талууд цөмийн туршилт зэрэг БНАСАУ-ын цаашид явуулж болзошгүй өдөөн хатгалгын талаар хэлэлцсэн гэдгийг онцлоод, тус улсын учруулах цөмийн болон пуужингийн аюул занал нь улам даамжирч байгааг тэмдэглэсэн байна.