БНХАУ энэ удаагийн ерөнхийлөгчийн сонгуульд намайг ялагдуулахын төлөө чадах бүхнээ хийнэ гэдгийг коронавирусний халдварыг хэрхэн хянаж байгаагаас нь харж болно гэж АНУ-ын Ерөнхийлөгч Дональд Трамп лхагва гарагт мэдэгджээ.

Д.Трамп Цагаан ордны Зууван танхимд “Reuters” агентлагт ярилцлага өгөх үеэрээ ийнхүү хэлжээ. Мөн тэрбээр АНУ-д 60 мянга гаруй хүнийг нас барахад хүргэсэн цар тахалд БНХАУ-ыг буруутгажээ. Мөн цар тахлын улмаас АНУ-ын эдийн засаг уналтад орж, түүний улиран сонгогдох боломж буурсан гэж хэлсэн байна.

АНУ-д вирус тархахаас урьдчилан сэргийлэх арга хэмжээнүүдийг эртнээс хэрэгжүүлээгүй гэх шүүмжлэлд өртөөд буй Бүгд найрамдах намын Ерөнхийлөгч тэрбээр, БНХАУ коронавирусний талаар дэлхий дахинд илүү эрт мэдээлэх ёстой байсан гэж ярьжээ. Ерөнхийлөгчөөс БНХАУ-ын эсрэг ямар нэгэн арга хэмжээ хэрэгжүүлэх эсэх талаар лавлахад, миний хийж чадах маш олон зүйл бий гэж хариулжээ.

“БНХАУ намайг өрсөлдөөнд ялагдуулахын тулд чадах бүхнээ хийнэ. Бээжин худалдаа болон бусад асуудалтай холбоотой шахалтыг сулруулахын тулд Жо Байдены ялалтыг илүүд үзэж байгаа. БНХАУ-ын эрх баригчид өөрсдийгөө гэм буруугүй болгохын тулд байнга олон нийтийн харилцааг ашигласаар ирсэн” гэж Д.Трамп хэлсэн байна.