Хонконгийн үндэсний аюулгүй байдлын тухай хуулийг баталвал Хятадын эсрэг НҮБ-ын Олон улсын шүүхэд хандан гомдол гаргаж, тус улсын эсрэг эдийн засгийн шахалтын арга хэмжээ авахыг Европын холбооны удирдлагад уриалсан тогтоолыг Европын парламент цахим чуулган хийх үеэрээ баталжээ. Өнгөрсөн баасан гаргийн орой нийтэлсэн санал хураалтын дүнгээр парламентын депутатуудын дийлэнх олонх нь буюу 565 нь тогтоолыг дэмжсэн бол 34 хүн эсэргүүцэж, 62 нь түдгэлзсэн санал өгчээ.

Энэ хуулийг хүчин төгөлдөр хэрэгжүүлснээр Хонконгийн автономит статусыг тодорхойлдог “нэг улс-хоёр систем” зарчмыг зөрчсөн явдал болж буй нь ийнхүү шүүхэд өргөдөл гаргах гол шалтгаан болж байна гэж Европын парламентын депутатууд үзэж байгаа аж. Түүнчлэн хүний эрх, хэвлэлийн эрх чөлөө зөрчигдсөнтэй холбогдуулан БНХАУ-ын эсрэг эдийн засгийн хориг арга хэмжээ авахад бэлдэхийг Европын парламент уриалжээ. Европын парламентын бүх тогтоол нь зөвлөмжийн шинжтэй байдаг бөгөөд эдгээрийг Европын холбооны институтууд хүртэл заавал хэрэгжүүлэх албагүй байдаг аж.

НҮБ-ын Олон улсын шүүх нь улс хоорондын хууль, эрх зүйн маргааныг шийдвэрлэх зорилготой бөгөөд сонирхогч бүх тал хэргийг авч хэлэлцэхийг зөвшөөрсөн нөхцөлд шүүхээр хянан шийдвэрлэх ажиллагааг эхлүүлэх боломжтой ажээ.