ОХУ Их Британитай зорчигч тээврийн харилцаагаа түр зогсоох хугацааг 2 дугаар сарын 16-ныг хүртэл сунгахаар болжээ. 

Иргэдийн эрүүл мэндийг хамгаалахын тулд Их Британитай агаарын харилцааг 2 дугаар сарын 16-ны 23 цаг 59 минут хүртэл сунгах шийдвэрийг коронавирусний халдвар тархах, зөөвөрлөгдөн ирсэн тохиолдол гарахаас урьдчилан сэргийлэх шуурхай штаб гаргасан байна. 

Их Британид коронавирусний шинэ хувилбар илэрсэнтэй холбоотойгоор ОХУ өмнө нь 12 дугаар сарын 22-нд Их Британитай нислэгээ зогсоосон юм.

Шинжээчдийн үзэж буйгаар халдварлах чадвар 70 хувь илүү гэх хувьссан коронавирус тархсаны улмаас Их Британид халдварт өвчний тун хүнд нөхцөл байдал үүсээд байгаа юм. Үүнтэй тэмцэхийн тулд Засгийн газар хатуу арга хэмжээ авах шаардлагатай болж, нэгдүгээр сарын 4-нд хөл хорио тогтоожээ.