Засгийн газрын өнөөдрийн ээлжит хуралдаанаар, Ерөнхий сайдаас иргэдийг жилд нэг удаа эрүүл мэндийн үзлэгт хамруулах үндэсний хөтөлбөр боловсруулахыг холбогдох сайд нарт үүрэг болгов.

Ингэхдээ, иргэн бүр насны ангиллаас хамаараад болж өгвөл жил бүр эрүүл мэндийн үзлэгт хамрагддаг байх бололцоог хангаж цахим мэдээллийн сан бүрдүүлэх юм. Цаашлаад, олон улсын жишигт нийцсэн дата бааз бүрдүүлэхийг үүрэг болгов.

Монгол Улсад нас баралтын тэргүүлэх шалтгаан нь зүрх судасны өвчлөл, хорт хавдар байдаг. Тухайлбал, 2010 оны байдлаар, хорт хавдрын 4466 шинэ тохиолдол илэрч байсан бол 2020 онд 6702 тохиолдол илэрч нэмэгдсэн нь анхаарал татаад байгаа юм. Шинээр илэрсэн хавдрын 73 хувь нь хожуу буюу хоёр, гуравдугаар шатандаа илэрдэг байна.