ОХУ ирэх сарын 1-нээс эхлэн Аргентин, Бразил, Бангладеш, Коста-Рика болон Монгол Улстай нислэгээ сэргээж, мөн Куба, Мексик, Катар улсууд руу хийх хуваарьт болон хуваарьт бус нислэгт тавьсан хязгаарлалтыг цуцлахаар болжээ.

Энэ тухай тус улсын коронавирусний халдвартай тэмцэх шуурхай штаб мэдээлсэн байна.

Аргентин, Бразил руу Москва-Буэнос-Айрес, Москва-Рио-де-Жанейро чиглэлээр долоо хоногт хоёр удаа, нисэх боломжтой бол Коста-Рика руу долоо хоногт хоёр удаа нислэг үйлдэхийг зөвшөөрчээ. Бангладеш улс руу мөн долоо хоногт хоёр удаа нислэг үйлдэх бол Монгол Улсын нийслэл Улаанбаатар хот руу Москва хотоос долоо хоногт гурван удаа, Улаан-Үд, Красноярск, Эрхүү хотуудаас нэг удаа нисэх боломжтой болно гэж шуурхай штаб мэдээлсэн байна.

Ирэх сарын 1-нээс Орос улс мөн Итали, Вьетнам, Киргизстан, Казахстан болон Азербайжан руу хийх тогтмол нислэгийнхээ тоог нэмэгдүүлэхээр болжээ.