ОХУ-д вакцин хийлгэсэн хүмүүст өөрийгөө тусгаарлах дэглэмийг сулруулах тухай Роспотребнадзор буюу тус улсын Хэрэглэгчдийн эрх ашгийг хамгаалах газрын шийдвэр хэрэгжиж эхэлжээ.

Вакцин хийлгэсэн иргэд энэ дэглэмийг өвчний шинж тэмдэг илрээгүй байх, мөн вакцинд хамрагдсан эсвэл халдвар аваад эдгэрснээс хойш зургаан сараас илүү хугацаа өнгөрөөгүй байх гэсэн хоёр нөхцөлд дагаж мөрдөхгүй байж болно.

Түүнчлэн ОХУ-ын Засгийн газар зөвлөгөө өгсөн, үзлэг хийсэн, вакцин хийсэн эмч нарт урамшуулал олгохоор болсон байна. Оросын эмч нар вакцинд хамруулсан хүний тоогоор  200 рубль авах боломжтой болох аж.

Тус улсад сүүлийн үед вакцинжуулалтад хамрагдах иргэдийн идэвх эрс нэмэгдэж, энэ нь өвчлөлийн тохиолдол буурахад нөлөөлж эхэлсэн байна. Оросын коронавирустэй тэмцэх шуурхай штабаас мэдээлснээр, өдөрт бүртгэгдэх халдварын шинэ тохиолдлууд долоо хоногийн туршид буурсаар байгаа аж. Хамгийн сүүлийн мэдээллээр, өдөрт илрэх халдварын тохиолдол 37 мянгаас доошилж буурсан байна.