Өсвөр насны 4 хүүхэд өчигдөр 17 цагийн орчим нийслэлийн Баянзүрх дүүргийн 26-р хорооны нутаг дэвсгэр, Үндэсний цэцэрлэгт хүрээлэнгийн урд хэсэгт орших тогтсон усанд амь насаа алдсан харамсалтай хэрэг гарав. Тогтсон ус нь Маршалын гүүрнээс зүүн тийш орших “Хан талст” ХХК-ийн эзэмшлийн газарт үүссэн байж. 

Тодруулбал, “Хан Талст” ХХК тухайн газарт тохижилтын ажил хийж, барилгын шороо авснаас хөрсний ус тогтсон байна. Энд хүүхдүүд хөөсөнцөр тавьж хөвж тоглож байгаад осолджээ. Хэргийн газарт үүссэн усан толионд өсвөр насны 10 орчим хүүхэд өчигдөр үдээс хойш тоглож байсан мэдээтэй байна. ОБЕГ-т 16:00 цагийн орчимд 8-12 насны хүүхэд живсэн талаар дуудлага ирүүлжээ. Албан хаагчид газар дээр нь ажилллаж нэг хүүхдийг нь уснаас аварсан боловч яаралтай тусламж үзүүлэх үед тэрээр амиа алджээ. 

Хүүхдүүд Дэнжийн 1000-аас ирж тоглож байгаад осолдсон бөгөөд Онцгой байдлын аврагчид 3 хүүхдийн цогцсыг гарган авчээ. 

Хэргийн талаар өчигдөр орой нийслэлийн Засаг даргын Тамгын газрын Хууль, эрх зүйн хэлтсийн дарга А.Даваажаргал, НМХГ-ын дарга Л.Эрдэнэчулуун, нийслэлийн Өмчийн ашиглалт, удирдлагын газрын орлогч дарга Д.Рэнцэнбямба нар мэдээлэл хүргэлээ.

Нийслэлийн Өмчийн ашиглалт, удирдлагын газрын орлогч дарга Д.Рэнцэнбямба, "Үндэсний цэцэрлэгт хүрээлэнд тавьж байгаа дугуйн замын ажлыг нийслэлээс хянах явцад зөвшөөрөлгүй барилга барьж байсан “Хан талст” ХХК-ийн үйл ажиллагааг шалгах Ажлын баг байгуулах шийдвэр гаргасан. Энэ дагуу ажлын хэсэг байгуулж, тухайн газарт хяналт шалгалт хийсэн ажлын хэсгийн дүнг тавдугаар сарын 21-ны Нийслэлийн Засаг даргын зөвлөлийн хуралдаанаар танилцуулсан. Шалгалтаар “Үндэсний цэцэрлэгт хүрээлэн” ОНӨТҮГ-ын эргэн тойрон дахь газруудад зөрчил дутагдал маш ихээр илэрсэн" гэв. Өнгөрсөн 7 хоногт тухайн газарт нийслэлийн Засаг дарга очиж, нөхцөл байдалтай танилцан “Хан талст” ХХК-ийн барилгын үйл ажиллагааг зогсоосон аж. 

https://montsame.mn/mn/read/226875