Оросын Холбооны Улсын Цэргийн их, дээд сургуулийг төгсөгчдөд цэргийн цол олголоо. Ёслолын ажиллагаанд Зэвсэгт хүчний Жанжин штабын нэгдүгээр орлогч дарга, хурандаа Ц.Жавхланбаатар, орлогч дарга, хошууч генерал Ж.Бадамбазар, Ажиллагааны удирдлагын газрын дарга, хурандаа С.Дашзэвэг, Зэвсэгт хүчний Агаарын цэргийн штабын дарга, бригадын генерал Б.Батбаяр нарын албаныхан болон төгсөгчид оролцсон юм. Энэ үеэр Зэвсэгт хүчний Жанжин штабын нэгдүгээр орлогч дарга, хурандаа Ц.Жавхланбаатар хэлсэн үгэндээ “Монгол Улсын тусгаар тогтнол, бүрэн эрхт байдлыг баталгаажуулахад үнэтэй хувь нэмрээ оруулсан бөгөөд өнө эртнээс мөнхийн хөрш байж, найрамдалт харилцаа, дайчин нөхөрлөлөөр холбогдсон Оросын Холбооны Улсад цэргийн боловсрол эзэмшинэ гэдэг нь нэр төрийн хэрэг юм. Цэргийн шинжлэх ухаан, технологийн чиглэлээр тэргүүлэгч тус улсад суралцагчдын тоо жилээс жилд өсөн нэмэгдэж байгаа нь Зэвсэгт хүчний нөөцийн чадамжид томоохон хөрөнгө оруулалт болж байна. Монгол Улс, Оросын Холбооны Улсын Зэвсэгт хүчний гадаад хамтын ажиллагааны хүрээнд явагдах бүхий л үйл ажиллагаанд та бүхний үүрэг, оролцоо улам бүр нэмэгдэх болно. Сургуулиа амжилттай төгсөж, ажил амьдралын гараагаа эхэлж байгаа залуу офицеруудынхаа цаашдын ажилд амжилт, амьдралд нь хамгийн сайн сайхан бүхнийг хүсэн ерөөе” гэв.

Эх сурвалж: "Соёмбо" сонин