Улсын онцгой байдлын шийдвэрийн дагуу ОМ-502 дугаартай Токио-Улаанбаатар чиглэлийн нислэгээр БНСУ-аас дамжин ирсэн 38 иргэнийг Халдварт өвчин судлалын үндэсний төвд шилжүүллээ.

ОМ-502 дугаартай нислэг Улаанбаатарын цагаар 18:30 цагт Чингис хаан олон улсын нисэх буудалд газардсан бөгөөд Мэргэжлийн хяналтын байгууллагаас ариутгал халдваргүйжүүлэлтийг хийсэн юм.

Нислэгийн 260 зорчигчоос 230 гаруй нь Монгол Улсын иргэд бөгөөд халдварын тархалт эрчимжсэн БНСУ-аас Токиогоор дамжин ирсэн 38 иргэнийг ийнхүү тусгаарлаж байгаа билээ. Дээрх иргэдээс халуурсан болон өөр ямар нэгэн сэжигтэй тохиолдол илрээгүй байна. 

Нислэгийн хуваарийн дагуу дээрх чиглэлийн онгоц өчигдөр газардах байсан ч цаг агаарын нөхцөл байдлын улмаас өнөөдөр болж хойшилсон юм.

Улсын онцгой байдлын ээлжит хуралдаанаар /2020.02.26/ Япон болон БНСУ руу үйлдэх шууд  нислэгийг гуравдугаар сарын 11-ний өдөр хүртэл түр хугацаанд цуцалсан билээ.

Өнөөдрийн нислэг нь хорионы хугацаанд Монгол Улсад газардах сүүлийн нислэг байсан юм.