Цагдаа нарт эрэн сурвалжлагдаж байсан Тайландын хар тамхины наймаачин Өмнөд Солонгост гоо сайхны мэс засалд орж дүрээ хувиргасан байжээ.
Өөртөө Сон Жимин гэх солонгос нэр өгсөн 25 настай Сахарат Саванжаенгийг цагдаа нар гурван сарын турш хайсны эцэст өнгөрсөн долоо хоногт Бангкок хотоос баривчилсан байна.
Гэрчүүд түүнийг царайлаг солонгос залуу байсан гэж цагдаа нарт мэдүүлжээ. Сахарат цагдаа нарт баривчлагдах үедээ “Би Өмнөд Солонгос руу явж шинэ амьдрал эхлүүлэхийг хүссэн. Тайландаас залхаж байна” гэсэн байна.
Тэрээр криптовалют ашиглан интернетээр MDMA буюу экстази гэх сэтгэцэд нөлөөлөх бодис худалдан авах захиалга өгсөн нь тогтоогджээ. 
Сахарат өмнө нь хар тамхины хэргээр цагдаа нарт саатуулагдан шалгагдаж байх үедээ оргон зайлж Өмнөд Солонгос руу гарч гоо сайхны мэс засалд орсон аж.
Тэрээр Европоос MDMA хууль бусаар оруулж ирдэг Тайландын зартай хар тамхины наймаачдын нэг юм байна. Тэрээр ихэвчлэн Нидерландаас бараагаа авдаг гэж цагдаа нарт өгсөн мэдүүлэгтээ дурджээ.