БНАСАУ-ын удирдагч Ким Жөн Ун хар салхинд нэрвэгдсэн Өмнөд Хванхэ мужид пүрэв гарагт очиж, нөхцөл байдалтай биечлэн танилцаж, байгалийн гамшгийн уршгийг арилгах чиглэл өглөө гэж Солонгосын төв цахилгаан мэдээний агентлаг /KCNA/ өнөөдөр мэдээлэв.

Ким Жөн Ун байгалийн гамшгийн үр дагаврын талаарх мэдээлэлтэй танилцсаныхаа дараа аль болох ойрын хугацаанд учирсан уршгийг нөхөн сэргээхийг хар салхинд нэрвэгдсэн бүс нутгийн оршин суугчдад уриалсан гэж “KCNA” агентлаг мэдээлжээ. Уг мэдээнд хар салхины учруулсан хохирлын талаар дэлгэрэнгүй мэдээлээгүй байна.

БНАСАУ-ын баруун хойд нутгийн мужуудад пүрэв гаргийн өглөө хөрсний гулгалт үүсгэсэн “Бави” хар салхи нутгийн оршин суугчдад хохирол учруулж, ургацыг сүйтгэжээ. Ким Жөн Уны хэлснээр, байгалийн гамшигт үзэгдлээс урьдчилан сэргийлэх “зохистой бэлтгэлийг” хангасан тул таамаглаж байснаас харьцангуй бага хэмжээний хохирол амсжээ.

Мөн БНАСАУ-ын удирдагч хохирлыг нөхөн сэргээх ажилд гар бие оролцохыг Хөдөлмөрийн намын Төв хорооны бүх хэлтэст үүрэг болгожээ. Ким Жөн Ун энэ долоо хоногийн мягмар гарагт Улс төрийн товчоог хуралдуулж, коронавирусний цар тахал болон БНАСАУ-ыг чиглэн урагшилж буй хүчтэй хар салхитай холбоотой арга хэмжээнүүдийн талаар хэлэлцсэн юм.