Японы Засгийн газар Токио, Осака тэргүүтэй өөр найман мужид тогтоосон онцгой байдлын дэглэмийг ирэх гуравдугаар сарын 7 хүртэл нэг сараар сунгажээ.

Ерөнхий сайд Сүга Ёшихидэ энэхүү шийдвэрийг мягмар гарагт болсон коронавирустэй тэмцэх ажлын хэсгийн уулзалтын дараа танилцуулжээ. Уулзалтад Эдийн засгийн асуудал хариуцсан сайд Нишимүра Ясүтоши, Эрүүл мэндийн сайд Тамүра Норихиса нар мөн оролцсон байна.

Японы 11 мужид нэгдүгээр сараас тогтоосон онцгой байдлын дэглэмийн хэрэгжих хугацаа энэ долоо хоногийн ням гарагт дуусах байсан юм.

С.Ёшихидэгийн мэдээлснээр, өнгөрсөн сард онцгой байдал тогтоосноос хойш Токиод төдийгүй орон даяар халдварын шинэ тохиолдлын тоо буурснаас үзэхэд зоогийн газар, шөнийн цэнгээний газрын ажиллах цагийг бууруулах зэрэг арга хэмжээнүүд үр дүнгээ өгчээ.

Гэсэн хэдий ч эмнэлэгт хэвтэн эмчлүүлж буй өвчтөнүүд, халдвар хүндээр илэрсэн өвчтөнүүдийн тоон үзүүлэлтийг бууруулахын тулд одоогийн хүчин чармайлтаа үргэлжлүүлэн гаргах хэрэгтэй байгааг Ерөнхий сайд онцлон тэмдэглэсэн байна.

Харин Токио хотоос хойд зүгт оршдог Точиги мужийн халдварын шинэ тохиолдлын тоо, эмнэлгийн ачааллыг харгалзан үзсэний дүнд онцгой байдлыг сунгахгүй байхаар шийдвэрлэжээ.

Мөн Японд халдварын нөхцөл байдал сайжирвал онцгой байдлын дэглэмийг гуравдугаар сарын 7-ноос өмнө цуцална гэдгээ Ё.Сүга мэдэгдсэн байна.