Хятад улс коронавирусний вакциныг анх удаа хүмүүнлэгийн тусламж хэлбэрээр Пакистан руу илгээжээ.

“Манай улсын Засгийн газар Пакистаны нийслэл Исламабад хот руу хүмүүнлэгийн тусламж хэлбэрээр коронавирусний вакцин илгээлээ. Тийнхүү Хятад улс анх удаа коронавирусний вакциныг хүмүүнлэгийн тусламж болгон хилийн чанад руу явуулж байна” хэмээн БНХАУ-ын Гадаад хэргийн яамны албан ёсны төлөөлөгч Ван Вэньбинь хэлсэн байна.

Үүнээс гадна Хятад улс Монгол, Бруней, Непал, Филиппин, Мьянмар, Камбож, Лаос, Шри-Ланк, Палестин, Беларусь, Зимбабве зэрэг хөгжиж буй 13 улсад хүмүүнлэгийн тусламж хэлбэрээр коронавирусний вакцин илгээхээр зэхэж байна. Цаашид хөгжиж буй нийт 38 улсад тусламж үзүүлэхээр төлөвлөж байгаа аж.

"Бид хөгжиж буй орнуудад вакцин түгээж, ДЭМБ-ын “COVAX” механизмд идэвхтэй оролцож байна" хэмээн Ван Вэньбинь мөн хэлжээ.