Даваа гарагт коронавирусийн цар тахлын асуудлаар болсон засгийн газрын шуурхай хуралд оролцохдоо амны хаалт зүүгээгүй Тайландын ерөнхий сайд 6,000 батаар ($190) торгуулахаар болжээ.

Ерөнхий сайд Прают Чан-Оча торгуулийг хүлээн зөвшөөрч, төлөхөөр болсныг дээрх хуралд оролцсон Бангкок хотын захирагч Асвин Кванмуанг өөрийн фэйсбүүк хуудсанд мэдээлсэн байна.

Засгийн газрын шуурхай хуралдаанд үнэхээр ерөнхий сайд ганцаараа амны хаалтгүй оролцсоныг хэвлэлийн мэдээний гэрэл зурагнаас харж болохоор байв.

Журам зөрчсөнөө сүүлд анзаарсан ерөнхий сайд Бангкок хотын захирагчтай утсаар ярьж, торгуулах хүсэлтээ илэрхийлсэн гэнэ. Т

айланд улсад сүүлийн өдрүүдэд коронавирусийн тархалт нэмэгдэж байгаа. 24 цагийн дотор тус улсад халдварын 2,048 шинэ тохиолдол бүртгэгдсэнийг Даваа гарагт зарлажээ.

Цар тахал эхэлсэн цагаас хойш Тайландад халдварын нийт 57,508 тохиолдол бүртгэгдэж, 148 хүн нас бараад байгаа юм. Нийслэл Бангкок хот болон 48 мужид Даваа гарагаас эхлэн гэртээ байхаас бусад бараг бүх тохиолдолд амны хаалт заавал зүүх хатуу журам хэрэгжиж байгаа.

Амны хаалтыг гадаа орчинд явахдаа, автомашин дотор нэгээс олон хүн зорчиж яваа тохиолдолд хүртэл зүүх юм. Ерөнхий сайд Прают нь амны хаалт зүүгээгүйнхээ төлөө торгуулсан эхний хүмүүсийн нэг болжээ.

Гэхдээ тэр торгуулийн дээд хэмжээ болох 20,000 батаар ($636) шийтгүүлээгүй өнгөрсөн байна. Тайландад гуравдугаар сараас вакцинжуулалтын хөтөлбөр эхэлсэн юм. 67 настай ерөнхий сайд тухайн үед AstraZeneca вакцины эхний тунг тариулж, үндсэний дархлаажуулалтын хөтөлбөрөө эхлүүлж байжээ.