БНСУ-ын “Samsung” группийн тэргүүн Ли Жэ Ёны эзэмшиж буй хувьцааны ханш унасныг үл харгалзан тэрбээр энэ оны эхний улиралд улсынхаа хамгийн чинээлэг хувьцаа эзэмшигчийн байр суурийг хадгалжээ.

Солонгосын “CXO” судалгааны хүрээлнгийн мэдээлснээр, Ли Жэ Ёны эзэмшиж буй хувьцаа гуравдугаар сарын эцсийн байдлаар 13.1 их наяд воноор /10.3 тэрбум ам.доллар/ үнэлэгдсэн байна. Энэ нь 2022 оны эхээр 14.2 их наяд вон байсантай харьцуулахад буурсан үзүүлэлт болжээ. 

“Samsung”-ийн тэргүүний араас “Kakao” корпорацийг үүсгэн байгуулагч, тэргүүн Ким Бём Су /11.4 их наяд вон/ хоёрдугаарт бичигдсэн бол жагсаалтын гуравдугаарт “Celltrion” эмийн компанийн хүндэт тэргүүн Со Чон Жин бичигджээ. Түүний хувьцаа 8.6 их наяд воноор үнэлэгдэж байна.

“CXO” хүрээлэнгийн мэдээллээр, БНСУ-ын 72 конгломератын 33 тэргүүний хувьцааны үнэ цэн дээр дурдсан хугацаанд 7.5 хувиар буурч, 59.8 их наяд вонд хүрсэн байна. Түүнээс “HDC Hyundai Development” үл хөдлөх хөрөнгийн компанийн тэргүүн Чун Мон Гюгийн хувьцаа хамгийн ихээр буюу 28.7 хувиар буурч, 202.3 их наяд вон болжээ. Харин “SeAH Steel Holdings” компанийн тэргүүн Ли Сун Хюны хувьцаа хамгийн ихээр өсөж, 111.3-аас 131.4 их наяд вонд хүрчээ.