БНХАУ-ын иргэний үл хөдлөх өмчийг хууль бусаар булаан авахдаа өндөр зохион байгуулалттайгаар ажилласан байж болзошгүй бүлэглэлийг олж тогтоосон. Үүнийг хуулийн байгууллага мухарлаж эцэслэх учиртай.

Тодруулбал, Эрүүл мэндийн яамны эсрэг талд байрлалтай “Аяуд” таувер нь БНХАУ-ын иргэний 100 хувийн хөрөнгө оруулалттай өмч байсан ч нотариат, иргэний бүртгэл, хил хамгаалах, цагдаа, прокурор, тагнуул гээд олон хуулийн байгууллагын албан тушаалтнууд, нөлөө бүхий хүний оролцоотойгоор өмчийг нь хууль бусаар булаан авсан нөхцөл байдал тогтоогдсон гэж Хууль, зүй дотоод хэргийн сайд Б.Энхбаяр өнөөдөр мэдээллээ.

Манай улсын хувь хүн, хуулийн этгээд нь гадаадын хөрөнгө оруулагч болох 50 гаруй иргэнийг хохироосон байж болзошгүй нөхцөл байдал тогтоогдсон. Шалгалтын ажил одоо ч үргэлжилж байна гэж Хууль, зүй дотоод хэргийн сайд Б.Энхбаяр онцоллоо.