Пүрэв гарагт БНАСАУ удирдагч Ким Жөн Уны шууд тушаалаар тив алгасагч "Хвасон-17" баллистик пуужин туршлаа гэж Солонгосын төв цахилгаан мэдээний агентлаг /KCNA/ мэдээлжээ.

KCNA-ийн мэдээлснээр, “БНАСАУ-ын стратегийн шинэ зэвсэг нь улс орны стратегийн зэвсэгт хүчний хүчин чадлыг дэлхий дахинд дахин тодорхой таниулах боломжийг олгоно” гэж Умард Солонгосын удирдагч онцлон тэмдэглэсэн байна. 

"Үндэсний батлан хамгаалах хүчин нь цэрэг, техникийн асар их чадвартай, цэргийн аливаа аюул занал, сүрдүүлэгт өртөхгүй болж, АНУ-ын империалистуудтай удаан хугацаанд сөргөлдөхөд өөрсдийгөө бүрэн бэлэн байлгах боломжтой болно" хэмээн Ким Жөн Ун цохон тэмдэглэв гэж тус агентлагийн мэдээнд дурджээ.

БНСУ-ын цэргийнхний мэдээлснээр, пүрэв гарагт харвасан Умард Солонгосын пуужингийн нислэгийн өндөр 6  200 км байсан бол харвасан цэгээс унасан цэг хоорондын зай 1 080 орчим км байжээ. Пуужинг орон нутгийн цагаар 14 цаг 34 минутад Пёньян хотын ойролцоох Сунан нисэх онгоцны буудлын нутаг дэвсгэрээс харвасан байна.  

БНАСАУ он гарснаас хойш 12 дахь удаагаа хүчээ харуулсан нь энэ юм. Гуравдугаар сарын 20-нд тус улсын Зэвсэгт хүчин зэрэг галлагч системээс гал нээсэн бол гуравдугаар сарын 16-нд баллистик пуужин туршсан ч амжилтгүй болсон байна. Хоёрдугаар сарын 27, гуравдугаар сарын 5-нд тив алгасагч баллистик пуужингийн систем туршжээ.