БНСУ-ын Ерөнхийлөгч асан Пак Гын Хэ өнөөдөр эмнэлгээс гарчээ. Тэрбээр биеийн байдлаа сайжирсан гэдгийг онцлоод, өөрийнх нь төлөө санаа зовниж байсан хүмүүст талархал илэрхийлжээ. Гэхдээ улс төрийн шинжтэй ямар нэгэн мэдэгдэл хийгээгүй байна.

Авлигын хэргээр 22 жилийн ял сонссон Пак Гын Хэ дөрвөн жил, есөн сар хоригдсоны эцэст өнгөрсөн 12 дугаар сард тусгай өршөөлөөр суллагдсан юм. Тэрбээр 11 дүгээр сараас хойш Сөүл хотын “Samsung” эрүүл мэндийн төвд эмчлүүлж байжээ.

“Миний бие таван жилийн дараа ард түмэнтэйгээ мэндчилж байна. Миний төлөө сэтгэлээ чилээж байсан та бүхэнд талархаж байна. Биеийн байдал маань их сайжирсан” гэж Пак Гын Хэ хэлжээ. Тэрбээр автомашинд суухаасаа өмнө ямар нэгэн асуултад хариулаагүй байна.

Ерөнхийлөгч асныг үг хэлэх үеэр өглөөнөөс хойш эмнэлгийн гадна хүлээсэн дэмжигчдэд нь баяртай байгаагаа илэрхийлсэн байна. Тэдний дунд түүний Тамгын газрын дарга асан Ким Ки Чун тэргүүтэй засаг захиргааных нь төлөөлөгчөөр ажиллаж байсан хүмүүс байжээ.

Өдгөө 70 настай Пак Гын Хэ Сөүлийн үндэсний оршуулгын газарт очиж, өөрийн аав хийгээд Ерөнхийлөгч агсан Пак Чон Хигийн шарилд хүндэтгэл үзүүлснийхээ дараа Сөүлээс зүүн өмнөд зүгт 300 километр зайд оршдог Дэгү хот дахь шинэ байрандаа очно. Тэрбээр Дэгүд очсоныхоо дараа олон нийтэд хандан үг хэлж магадгүй байна.

Пак Гын Хэгийн улс төрийн шинжтэй мэдэгдэл, тэр дундаа БНСУ-ын Ерөнхийлөгчөөр сонгогдоод буй Юн Сок Ёлын талаар юу гэж хэлэх нь олны анхаарлыг ихэд татаж байгаа бөгөөд үүний учир нь Ерөнхийлөгч асанд 2017 онд импичмент зарлаж, улмаар албан тушаалаасаа огцорч, хорих ял сонсоход нь хүргэсэн авлигын хэргийг прокурор асан Юн Сок Ёл мөрдөн шалгаж байжээ.